德顿语圣经创世纪1
Jenesis 1
Nai Maromak halo lalehan, rai ho buat hotu-hotu iha nia laran
1Hahuu fofoun, Nai Maromak halo lalehan ho rai.
2Iha tempu nebaa, mundu seidauk iha forma i buat ida seidauk iha. Bee deit mak iha. I nakukun taka metin bee nee. Maromak nia Espiritu book-aan baa-mai iha bee nia leten.
3Nai Maromak hatete, “Iha naroman baa.” Koalia tiha nunee, naroman iha kedas.
4Maromak nia laran haksolok, tanba Nia haree naroman nee diak duni. I Nia haketak naroman nee hosi nakukun, para ida-idak ho nia oras rasik.
5Nia foo naran ba naroman nee ‘loron’, i nakukun nee ‘kalan’. Nee mak loron ida.
6Nai Maromak hatete, “Iha fatin mamuk baa hodi haketak bee.
7Nee para iha bee iha parte leten, ho bee iha parte kraik.” Koalia tiha nunee, bee nee fahe ba rua.
8I Nia foo naran ba fatin mamuk nee ‘loro leten’. Nee mak loron rua.
9Nai Maromak hatete, “Bee iha parte okos nee baa hamutuk iha fatin ida, para bele iha rai maran.” Koalia tiha nunee, rai maran iha ona.
10Parte maran nee, Nia tau naran ‘rai’, i bee nebee halibur hamutuk nee, Nia tau naran ‘tasi’. Nai Maromak nia laran haksolok, tanba haree buat sira nee hotu diak duni.
11Nai Maromak hatete, “Rai sei foo moris duut ho ai. Ai sei foo fuan, duut sei foo musan, tuir ida-idak nia modelu.” Koalia tiha nunee, duut oi-oin ho ai oi-oin iha kedas.
12Iha rai maran, duut ho ai sira foo musan ho fuan tuir ida-idak nia modelu. Nai Maromak nia laran haksolok, tanba Nia haree buat sira nee hotu diak duni.
13Nee mak loron tolu.
14Nai Maromak hatete, “Iha parte leten, tenki iha buat oi-oin para foo naroman ba rai. Tenki iha buat nebee foo naroman ba loron, ho buat nebee foo naroman ba kalan. Nee hanesan sinal hodi sura tempu, loron, ho tinan.”
15Koalia tiha nunee, buat naroman sira nee hotu iha kedas.
16Nunee Nai Maromak halo buat naroman boot tipu rua. Ida boot liu foo naroman ba loron; ida kiik liu foo naroman ba kalan. I Nia mos halo fitun sira hotu.
17Nia tau buat sira nee iha loro leten, hodi foo naroman mai rai,
18iha tempu loron, no iha tempu kalan. Nunee, buat sira nee haketak naroman hosi nakukun. Nai Maromak nia laran haksolok, tanba Nia haree buat sira nee hotu diak duni.
19Nee mak loron haat.
20Nai Maromak hatete, “Iha ikan bara-barak baa ho buat oi-oin tan nebee moris iha bee laran. Iha manu fuik bara-barak baa hodi semo iha loro leten.”
21Nai Maromak halo ikan oi-oin, animal boboot nebee moris iha tasi laran, ho buat oi-oin tan nebee moris iha bee laran. Nia mos halo manu fuik oi-oin. Nai Maromak nia laran haksolok, tanba haree buat sira nee hotu diak duni.
22I Nai Maromak foo bensaun ba animal sira nee hotu dehan, “Ikan sira amenta barak baa para halo nakonu iha nebee-nebee. I manu fuik sira mos amenta barak baa.”
23Nee mak loron lima.
24I Nai Maromak hatete, “Iha animal oi-oin baa hodi moris iha rai maran. Hanesan animal hakiak, animal fuik, i animal nebee dolar iha rai, ida-idak hahoris tuir nia modelu.”
25Koalia tiha nunee, animal sira nee iha. Nai Maromak nia laran haksolok, tanba Nia haree buat sira nee hotu, diak duni.
26Nai Maromak hatete, “Mai Ita halo ema hanesan Ita nia Aan. Para sira domina ikan hotu-hotu iha tasi, manu fuik hotu-hotu iha loro leten, animal hakiak hotu, ho animal sira seluk nebee moris iha rai.”
27Nunee Nai Maromak halo ema hanesan Nia Aan. Nia halo sira mane ho feto.
28I Nia foo bensaun ba sira dehan, “Imi iha oan bara-barak baa, hodi halo mundu nakonu, i tau matan baa. Imi mos tenki domina ikan, manu fuik, ho animal hotu nebee moris iha rai.
29Rona didiak mai! Hau foo ba imi ai haan oi-oin iha rai nee, hanesan ai nebee foo fuan ho ai nebee foo musan.
30Hau mos foo ai tahan ho duut oi-oin, ba animal sira nia hahaan. Hahaan ba animal fuik sira, animal sira dolar iha rai, ho manu fuik sira.” Koalia tiha nunee, hahaan oi-oin mos iha.
31Nai Maromak haree buat sira hotu nebee nia halo ona nee, i Nia laran haksolok, tanba buat sira nee diak teb-tebes. Nee mak loron neen.
德顿语里有无数的葡语借词，懂葡语的童鞋有没有觉得哪些词看着眼熟？
